Wednesday, May 7, 2008

مين آسر دم الشعب؟

هو إحنا ناقصنا إيه؟؟

يعني مثلاً باقي البشر عنهم ذراعين و إحنا ماشين بنصف ذراع؟؟


البشر عندهم رجلين و أحنا ماشين بصباعين بس؟؟


البشر عندهم جوز عيون وإحنا أكتفينا بالنني؟؟


ولا ابشر عندهم مخ وإحنا قررنا نكتفي بالمخيخ؟ طب والله ده حتى المصري بيفهمها وهي تطايره وذكي بالفطرة حقيقة مش تهريج؟؟


أكيد بما أن كل ألي فات ده مش ناقصنا، يبقى إحنا ناقصنا دم ، واضح إن ألي بيجري في عروقنا ميه ساقعة مثلجة ..


ليه؟؟؟!!!!!


السؤال ده هيجنني؟؟


كلام كتير أتقال يوم 4 مايو عن التضامن اللبنانيين والأردنيين معنا في الإضراب ، ومع وجود إضراب خاص بالبنان يوم 7 مايو.


وأستنينا يوم 4 مايو على الأقل ينجح الإضراب زي 6 إبريل ؟؟؟


محصلش حاجة خاااااااااااااااالص ..


بعد الشلل الأطفال ألي أصاب الجميع كبار وصغار ..


قلنا مليون تحليل عن الأسباب والمبررات .. وناس قالت العلاوة خلت الناس تهدا..


وبعدين جه ارتفاع الأسعار و القلم على القفا ألي خده الشعب كله بلا استثناء .


وقلنا الناس خلاص طلعت من هدومها والعيشة بقت مش ممكنه وهنشوف اعتراضات بقى .. و هنسمع أصوات الناس المقهورة بتتكلم..


وسهرت طول الليل مستنيه أخبار عن إن الناس ، زعلت أتقمصت قالت لا ..أي حاجة .. أي تصرف يحسسني أن المصريين لسه عايشين مش جثث بتتحرك بالقصور الذاتي..


وكالعادة لا حياة لمن تنادي.. الصمت الرهيب ..وكل واحد ماشي في الشارع يضغن في نفسه ويبرطم بكلمتين ..وخلاص خلصت.


النهاردة بقى كان إضراب لبنان ..وانتظرت وأنا قلقانة عايزة أشوف كل الناس زينا ولا إحنا حالة فريدة في الكرة الأرضية..


بجد شعرت بالقهر مع الأخبار ، الناس اعترضت و اتظاهرت وأضربت لدرجة غلق المطار لعدة ساعات ،وطالبوا برفع الحد الأدنى للأجور .. وهيصة كبيرة وكلام يشرح نفس –أي حد لبناني طبعًا لأن إحنا بنتحسر بس- ويحسسنا إن الناس دي عايشه بتغضب وتثور وتعبر عن ثورتها ، ناس شايفة إن ليها حق ولازم تاخدة.. ناس عارفة إنهم بشر ولازم يتعاملوا كبشر؟؟


إحنا إيه ألي جرالنا؟؟ ليه بقينا كده ؟؟ ليه فقدنا القدرة على إننا نؤمن بأننا بني ادمين ولازم نعيش عيشة بني أدمين..


هو إحنا ألي طول عمرنا كده؟؟؟


ولا النظام ده هو ألي حولنا لكده؟؟؟


هو الدم ألي في عروقنا حد آسره في ظروف غامضة؟؟

طيب ممكن ندفع فديته ونرجعه تاني؟؟

ولا ألي أسروه كانوا عندهم عادة قتل الأسرى؟؟؟؟

3 comments:

mohamed kamal hassan said...

أنا رديت على تعليقاتك على بوستاتى القديمة
ليا عودة تانية ان شاء الله للتعليق على مدونتك

تحياتى

مواطن مصري said...

الاضراب فشا عشان وش الاخوان الفقري



اهلن بيكي في حركة السواقين

دعاء said...

محمد كمال

نورت المدونه وأشكرك لردك عليّ في المواضيع القديمه لديك وانتظر أرائك في التدوينات هنا ، كما انتظر صدور كتابك الجديد

-------------

مواطن مصري

يعني الحكومه و الميعاد والعلاوة و و و كل دول مفشلوش الأضراب وعملها الاخوان ..والله الحاجة ألي الاخوان بيصعبوا عليا فيها انهم تقريبًا هيخلوهم هما المسئولين عن امواج تسونامي في اندونسيا أزي معرفش بس اكيد هما المسئولين:D

وشكرًا لترحيبك بي في حركة السواقين بس قلي الأول الأجرة كام ..علشان الاسعار اليومين دول اتجننت

انتظر ارائك في باقي التدوينات